Auzotik Galdakao. 6 eremua

Bigarren tailer honetan proiektuaren plangintza xehetasunez azalduko dugu. Bereziki, 1. fasea (diagnostiko partekatua) azalduko dugu.

Halaber, proiektua oztopatu edo lagundu dezaketen elementuen inguruan lan egingo dugu.

BILKURAREN AURKEZPENA.

Bileraren helburuak aurkeztu dira: aurreko saiora joan ez zirenentzat prozesua berriro azaltzea, 1. fasea xehetasunez azaltzea eta proiektua geldiarazi edo lagundu dezaketen elementuen inguruan lan egitea.

PROIEKTUA AURKEZTEA.

Aurkezpen-txandaren ondoren, proiektuaren azalpenari ekin zaio. Azaldu da Auzotik Galdakao proiektuak Galdakaoko auzoen garapen orekatua bilatzen duela, eta horretarako, lehen urrats gisa, udalerria zonifikatu da. Sei eremu definitu dira. Horietako bakoitzean 4 fase dituen proiektu bat jarriko da abian.

• 0 fasea. Prozesuaren definizioa eta diseinua. Udalak proiektu bat prestatu du eta auzotarrekin eztabaidatu nahi du, auzo bakoitzaren errealitatera hobeto egokitzeko.
• 1.fasea. Parte-hartze bidezko azterketa estrategikoa. Eremu bakoitzaren errealitatea aztertuko da, haren beharrak identifikatzeko.
• 2.fasea. Estrategia formulatzea. Behar horietan oinarrituta, auzoak hobetzeko bidean aurrera egiteko 4 urterako jarduketak bilduko dituen proiektua prestatuko da.
• 3. fasea. Estrategia abian jartzea. Jarduerak datozen 4 urteetan jarriko dira abian.

Proiektu hau martxan dago bi eremutan (1. eta 2. eremuak) esperientzia piloto moduan.

Aurkezpenaren bigarren zatian xehetasun handiagoz azaldu da proiektuaren 1. fasea. Urritik martxora bitartean informazioa bilduko da eremuaren diagnostikoa egiteko. Jarduera hauek egingo dira:

• Biztanleei egindako inkesta (teknika kuantitatiboa). Azaroa eta abendua bitartean egingo da.
• Eztabaida-taldeak (teknika kualitatiboa). Azaroan egingo dira.
• Tailer irekiak. Jarduera parte-hartzailea, nahi duten pertsona guztiek auzoei buruzko ikuspegia eman dezaten. Abenduan egingo dira.
• Deriba. Auzoetan barrena gidatutako ibilbide bat da, leku jakin batzuetan geldituz, arazo eta behar desberdinei buruz hitz egin ahal izateko. Urtarrilean egingo da. Deriba bat, agian, eremu osoa zeharkatzeko nahikoa ez izatea planteatzen da, haren tamaina dela eta.

Halaber, azaldu da 1. fasearen hasieran Lurralde Kontseilua sortuko dela. Partaidetza-organo hori Udalak (arduradun politikoak eta teknikoak) eta herritarrek (kontseiluko kide izateko interesa duten pertsonak eta erakundeak) osatuko dute. Kontseiluaren eginkizunetako bat izango da estrategian jasotako jardueren jarraipena egitea. 2024ko azaroan sortzea aurreikusi da.

PROIEKTUA LAGUNDU EDO OZTOPATU DEZAKETEN ELEMENTUEN INGURUKO HAUSNARKETA.

Proiektua zaildu dezaketen elementuak:

• Goiko eta beheko auzoen artean alde handiak daudela aipatu da. Goialdeetan ez dago ezer, eta behealdeetan dena dute eskuragarri (merkataritza-jarduera, gizarte-bizitza, aisia...).
• Auzo-identitate gutxi dagoela ere adierazi da, baina ñabardura bat egin da: goiko aldean egon daiteke gehien.
• Auzoa ezagutzea eta aktibatzea erraztu dezaketen topagunerik eza nabarmendu da.
• Konpromisoak bete gabe daudenean horrelako proiektuak sinestea pixka bat kostatzen dela esaten da.
• Zubiaurretarreneko igogailua jarri dute adibide gisa. Horri buruz hitz egin da, eta ikusten da ez dagoela erabat argi udalak igogailua eraikitzeko konpromiso irmoa hartu zuenik.
• Eremu horretarako proiektuei buruzko informaziorik eza ere aipatu da.

Auzoetan identifikatzen diren arazoetako batzuk ere aipatu dira:

• Aldapa eta eskailera asko denetaedonora joateko. Arazo bat da, batez ere adinekoentzat.
• Galdabusa ez da goialdera iristen.
• Ez dago dendarik.
• Lonja huts asko.
• Planifikatu gabe eraiki da. Eraikin asko eta plaza gutxi, berdegune gutxi eta abar.
• Arazoak kale batzuetako norabideekin.
• Bide-segurtasunik eza: arazoak autoen abiadurarekin edo toki batzuetan ikuspen urria izatearekin.
• Mantentze-lan eskasa.

Udalak proiektura bideratuko duen diru-kopuruari buruz galdetu da. Erantzun da milioi bat euro bideratuko direla urteko (datozen 4 urteetan) 6 eremuen artean banatzeko. 6. eremuari 140.000 € dagozkio. Aurrekontu horren xedea prozesuan bertan erabakiko da, hau da, baldintzak betetzen dituzten proposamen adostuak (teknikoki bideragarriak direnak, udalaren eskumenekoak direnak, gobernu-planarekin bat datozenak, eta abar) eta aurrekontu-muga horretan daudenak gauzatzeko konpromisoa hartuko du Udalak. Kopuru hori gainditzen dutenak udalari helaraziko zaizkio, eta hark aztertu eta erantzungo ditu.

Azkenik, hurrengo bilerarako deia egin zaie bertaratuei. Uda ostean, diagnostikoarekin lotutako kontuak landuko dira, eta diagnostikoa egiteaz arduratuko den talde teknikoa ere bertan izango da.